من اشعار عزت ابراهيم

مش كل الناس اشرار

يــاه
كل دي أنفاس في صدرك ؟
مالك ؟
خايف ليه ..؟!
مش كل الناس باصين للي في إيدك
إهدا
إفرد دراعاتك وطير
افتح ورقة بيضا
واملاها بإسمك
وأسامي الناس للي بتحبك بجد
وإفتح ألبومك واتفرج على صورك القديمة
واصفى

يــاه
كل دي عيون في راسك ؟!
كل دا قلق
عايز تعرف دَبَّـة النملة
بتحس بنشوة
لما بتنصب فخ لغيرك
ويقع
وبتقلق جداً
لو كان أذكى منك
وسكت ..
المدهش
إن عنيك
قبل ما بتشوف الناس
بتبص عليك
إذا كنت بتكره
تكره
واذا كنتش - فرضاً-
بتحاول تزرع جواك الشك
يــاه
كل دي وشوش
وش
مع أي بنت حلوة تقابلك
ووش
مع أي بنت مش حلوة
وش
مع أي حد متعرفوش وميعرفكش
ووش
مع أي حد تعرفه ويعرفك كويس
يــاه
للدرجة دي
انت خايف
اطمِّن ..
مش كل الناس أشرار
ز
ي
ك .