من اعمال شاعر العامية الجميل عزت ابراهيم

ريشة ومحبرة

صبحين وليل
نقطة حياه تفصل "م" بين
سطرين عدم
وانا لسّه حى
والليل "ف"عرفى مملكه
با ملكها "م" الراس للقدم
فمتسلبوش منّى الحياه بالشقشقه
فارس أنا "ف" الليل باكون
"ف"اديه مالك مهرتى
وبإمرتى
تتشقلى من تحت جلد الرأس سما
وتنط جوه الجمجمه فكرة جنون
إيه لو يكون الصبح ملاَّكى
أملك زمامه وذمته
وأقولّه : كون
وافرش حصيرتين مصطباوى وانتظر
ساعة سكون
واعلن على كل البشر
النص نص (ميتون)
إن الحياه تبدأ بليل
وان القمر من جوه ليل
وان النهار "في" الأصل ليل
حتى الغنا يبدأ بليل
لو كان جميل
فمتعدموش الضل "ف" ميدان السباق
وادوله ريشه ومحبره
وادوله
سيف